ZPM-in LMC leh Zemabawk LC inthlan buatsaih ngam loah MNF sorkar an puh

ZPM party hruaitute chuan nimin khan Aizawl Press Club-ah thuthar thehdarhtute an kâwm a; MNF kaihhruai sorkar chu Lunglei Municipal Council (LMC) inthlan leh Zemabawk Local Council by-election buatsaih ngam loah an puh.

ZPM secretary general PC Vanlalruata chuan, chief minister Zoramthanga biala Zemabawk LC-ah MNF leh Congress LC member pakhat ve vein ZPM an zawm avangin ZPM leh MNF-in LC member pathum ve ve an neih mek thu a sawi a, "Sorkarna siam thei an awm loh avangin Mizoram Municipalities Ward Committee and Local Council Rules, 2010 hmangin LC hi August 16, 2022 khan ṭhiah a ni," a ti.

PC Vanlalruata chuan, Mizoram Municipalities Rules-in a sawi angin, LC ṭhiah a nih chuan administrator atan LC huam chhunga mi challang (prominent citizen) ruat tur a nih thu sawiin, "LC inthlana MNF ticket-a tling zo lo Pu Kapsanga chu administrator a tan dah a ni," a ti a; MNF sorkar thil tih dan chu mak an tih thu leh an dem thu a sawi.

LC ṭhiah a nih chuan Mizoram Municipalities Rules chuan thla ruk chhungin inthlan buatsaih tur tih a nih thu sawiin PC Vanlalruata chuan, "Ni 60 ral hnu, October 16, 2022 thlengin inthlang tura hmalakna hmuh tur a awm lo. SEC chuan GAD aṭangin inthlan buatsaih a ngaih thu hriattirna an la dawng lo," a ti.

ZPM Secretary General sawi danin, Chief Minister bial chhunga vote tamna ber Zemabawk LC inthlan a hun taka buatsaih a nih loh chhana a mawhphurtu, a kaikuang chu GAD changtu chief minister Zoramthanga a ni.

PC Vanlalruata chuan, Mizoram sorkarin Lunglei Municipal Council a dinah kumin chhung ngeia inthlanna buatsaih a nih tur thu municipal enkawltu UDPA department changtu deputy chief minister Tawnluia'n vawi hnih a puang tawh tih a sawi a, "ZPM chuan LMC Election Committee dinin, inbuatsaihna thui tak a kalpui tawh a ni," tiin, LMC-ah sorkarna lak ngei an inbeisei thu a sawi.

ZPM hruaitute chuan, October 14, 2022-ah LMC electoral roll tihchhuah a nih tawh thu sawiin, "Lunglei khawngpui a chhiat lutuk vanga Lunglei Sub-Hqrs. YMA-in October 18, 2022-a No Vehicles Day an hman tâk si avangin LMC inthlan hi an buatsaih ngam leh dawn lo niin ka hria," an ti a; ZPM chuan inthlan buatsaih vat an duh thu an sawi a ni.