Aizawl district-ah hâlpuah khap

Aizawl district bawrhsap Dr Lalhriatzuali Ralte chuan nimin khan Aizawl district-ah thla hnih chhung hâlpuah, hâlmawi, meithallàwn (sky lantern) leh silai lem (a mu kap chhuak thei) khap a nih thu a puang. Thupek bawhchhiate chu IPC Section 188 tlawhchhanin hrem theih an ni.

Krismas leh kumthar hunpui a thleng hnai tawh tih tarlangin Aizawl DC chuan, "He hun hi Aizawl district mipuite'n dam leh hlim taka kan hman ṭheuh theih nan, boruak thianghlim lo leh bengchheng siam thei hâlmawi leh hâlpuah te, kângmei chhuah palh thei sky lantern te, mihring leh thil dang tana inhliam phah theih silai lem (a mu kap chhuak thei)-te hi khap ngei a ṭul a. Chuvangin, Aizawl district-ah lâk luh, zawrh, hralh, hâl leh hmante khap tlat a ni," a ti.