Serchhip District Hospital sak turah JAC-in Court-ah PIL thehluh an tum

Joint Action Committee on Serchhip District Hospital Site kaihhruaia Serchhip khawpuia village council, YMA, MHIP leh MUP branch hrang hrangte leh welfare tin aiawhte nimina ṭhukhawm chuan, Serchhip District Hospital building thar a hmun ngaiah sak thuai a nih theihna tura High Court-a public interest litigation (PIL) thehluh tum an thláwp.

Nimina Serchhip Kawnpui VC Hall-a ṭhutkhawmah hian resolution an siam a, "JAC-in a hmun ngaia Serchhip District Hospital sak a nih ngei theihna atana an hmalakna leh tun dinhmuna Gauhati High Court-a PIL file an tum hi ṭha kan tiin, a tàwp thlengin kan thláwp tlat dawn a ni," an ti a; PIL file tumah a ṭul dan azirin khawtlang huapin thawhlawm khawn an remti bawk.

Serchhip District Hospital sakna tur hian Power Grid Corporation of India (PGCI) corporate social responsibility aṭangin cheng vbc. 21 hmuh a ni a, project an siamah chuan a hmun ngaia sak tura tih a ni. Mahse, Serchhip District NGO Coordination Committee erawh chuan Bûkpuia sak an duh thung.

Damdawi-in sakna hmun turah duh dan inan loh vanga thu inchuh a awm hnuah, September 26, 2022-a Serchhip DC hoa JAC leh NGOCC aiawhte ṭhukhawm chuan joint statement an siam a; NGOCC chuan damdawi-in chu Bukpuia sak duh mah se, sorkar thutlukna apiang an pawm theih thu ziakin an nemnghet a ni.

District Hospital sakna turah Mizoram sorkarin tun thlengin thutlukna a la siam loh avangin JAC hruaitute October 19, 2022-a ṭhukhawm chuan Gauhati High Court-ah PIL thehluh an rêl. An thutlukna chungchang chu JAC chuan nimin khan Serchhipa VC-te leh pawl hrang hrang aiawhte an sawipui leh a, PIL thehluh chu an thláwp a ni.