India-Bangladesh Buyer Seller Meet-ah ZPM hruaitute an tel

October 19-20, 2022 chhunga Indian Chamber of Commerce leh Ministry of Commerce & Industry-a Department of Commerce ten an buatsaih, India-Bangladesh Buyer Seller Meet, Taj Vivanta, Guwahati-ah ZPM hruaitute an tel a; Mizorama thar sawhthing, hmunphiah, dragon fruit, hmarcha, large cardamon leh thil dangte hralhna tur an ngaihven.

India-Bangladesh Buyer Seller Meet-ah hian India leh Bangladesh-a ram hruaitute leh sumdawngte an tel a; ZPM aṭangin MLA Dr Vanlalthlana, Policy Drafting Committee vice chairman F Rodingliana leh member H Lianzuala leh, ṭhalai senior vice president Dr C Lalrammawia te an tel. Assam Commerce and Industries minister Chandra Mohan Patowary chu khuallian niin, DoNER minister of state BL Verma leh Bangladesh prime minister adviser Dr Mashiur Rahman chu khualzahawm a ni.

MLA Dr Vanlalthlana chuan a bial chhunga nu ho puantahte kengin, hralhna tur a buaipui a; "Ka biala nu hoin Mizo thar là leh silk hmanga puan an tahin ngaihhlut a hlawh a, a lawmawm hle. Kan puan design-te kan humhalh a, kut tah puan kan tihhlut thiam a ṭul a, India ram páwn thlenga thawn chhuak thei tura hmalak a ṭul a ni," a ti.

ZPM consultant F Rodingliana chuan, large cardomon chu sawhthing leh hmarcha duh apiangin an duh thu sawiin, tunah chuan a man a ṭha em em tawh a, Mizorama kut hnathawkte tan malsawmna thlentu a nih theih a beisei thu a sawi.