Minister-in ZMC Week a hmanpui

Zoram Medical College chuan nimin khan Vaivakawn Cultural Centre cum Auditorium-ah ZMC Week khârna leh Cultural Day - Elixir 2022 an hmang a, Health minister Dr R Lalthangliana'n a hmanpui. Minister chuan, Mizo zingah cancer super specialist pakhat chauh a la awm thu a sawi.

Dr R Lalthangliana chuan, ZMC-a MBBS zir hmasa berte chu kum 2023-ah an chhuak tawh dawn tih sawiin, "Mizo doctor zingah MBBS chu an tam tawh nã a, mithiam bik, superspecialist an la tlem. Tuna ZMC-a MBBS zirlaite pawh MBBS-ah duh tâwk mai loin, thiamna sang lehzual ûm turin ka duh che u a ni," a ti.

HFW Minister chuan, JICA nen thawkhoa cheng vbc. 700 sénga Aizawla Cancer Super Speciality Hospital din tum chu kum 2028 tàwp lamah peih hman beisei a ni a, India hmarchhak biala cancer damdawi-in ṭha ber a nih theih nan theihtawp chhuah a nih thu a sawi a; tun hnaiah cardiology leh nephrology-ah super specialist pakhat ve ve an awm thar thu a sawi bawk.