Bawng lâk luh leh lâk sawn khap a ni

Champhai District Magistrate chuan, Myanmar aṭangin Champhai district-ah bâwng lâk luh leh Champhai district chhunga bawng phurh sawn/khawih chêt khapna thupek a chhuah. Thupek hi thla hnih chhung atan a ni a, thupek bawhchhiate chu hrem theih a ni.

Champhai Bawrhsap chuan, tun hnaiah bâwng aṭangin ran natna, Foot & Mouth Disease (FMD) vei hmuh chhuah a nih thu leh Champhai district-a Myanmar ramri hnaih khaw ṭhenkhatah FMD vei nia rinhlelh hmuh a nih avangin khapna thupek chhuah a nih thu a tarlang a; "Champhai district-ah Myanmar aṭanga bâwng lak luh phal a ni lo. District chhungah bawng phurh sawn/khawih chêt rih loh tur a ni a, hri kai lo nia hriatte pawh hmun dangah phurh sawn khap tlat a ni," a ti.