KHAWTHLIR

Special session ko
Governor Hari Babu Kambhampati chuan November 4, 2022-ah Legislative Assembly special session a ko. Thu dawn danin, Aseembly special session hi Mizoramah President Droupadi Murmu a rawn zin dawn vanga koh a ni a; hemi chungchangah hian Assembly Secretariat chuan October 20, Ningani khan hriattirna a chhuah a ni.

Thisen pe
8th Assam Rifles-te chuan nimin khan Serchhip District Hospital tan thisen unit kua an pe a; Zomi Inkuan, Siaha pawhin Siaha District Hospital tan thisen unit riat an pe bawk.

Zir man tum dawn
Aizawl South-II MLA Lalchhuanthanga chuan nimin khan a bial chhunga City Computer Centre kum 10 tlin champha lawmna, Synod Conference Centre-ah a hmanpui. MLA chuan, computer thiam a pawimawh tih sawiin, "ZPM policy ‘Bána kaih’ nen inzawmna nei a ni a, ka ngai pawimawh hle. Kum 2023 aṭangin he Centre-a zirte chu zir man BPL tan 50% leh BPL ni lo tan 30% MLA fund aṭangin kan tum sak dawn a ni," a ti.

Police ralthuam pho chhuak dawn
Mizoram Police Headquarters chuan Police Commemoration Day leh Police Flag Day pualin October 25, 2022 khian PHQ Arya Mess-ah rálthuam chi hrang hrang an pho chhuak dawn. Chawhma dar 11 aṭanga chawhnu dar 3 thleng mipui en theih turin an hawng dawn a ni.

Ruihhlo ti lo turin intiam
Foundation For Drug-Free, Mizoram huaihawtin nimin khan Presbyterian English School, Thingsulthliahah ruihhlo ṭhat lohzia inzirtirna hun buatsaih a ni a, zirlai 150-te chu ruihhlo ti lo turin an intiam.

Thuthlung ziak
Mizoram University leh Forest Research Centre for Bamboo & Rattan/Rain Forest Research Institute chuan October 20, Ningani khan thawhhona thuthlung, memorandum of understanding an ziak. MoU hnuaiah hian student exchange programme, scientist faculty cooperation, joint consultancy, joint training leh thil dangte kalpui tur a ni.