KHAWTHLIR

Mara Students' Organisa­tion (MSO), Shillong chuan nimin khan Siaha District Hospital-ah thisen pek rûnpui an huaihawt a, thisen unit 19 an pe a, a petute mipa 12 leh hmeichhia pasarih an ni.

July 11, 2019-a thi MJA member Richard Lal­lawmzuala, Zoram Tlangau editor chu nimin khan IPR director Lallianpuii pisaah sorkar hminga ràlna hun hman a ni a, sorkar aṭanga ràlna Rs. 1,00,000 chu Richard Lallawmzuala pa, Lalbiakthanga Pa­chuau, prominent journalist hnenah IPR Director-in a hlân. A damloh chhunga inenkawlna sênso phuhrûkna (medical re-imbursement) Rs. 1,00,000 a hlân nghal bawk.

Nimin khan Champhai DC Maria CT Zuali hoin kumina Independence Day hman dan tur rel a ni. Meeting-a rel a nih dan chuan Champhaia Independence Day lawmnaah hian parade contingent leh pipe band-te an awm dawn lo a, police leh NCC-te erawh Khuallian chhawn­a hnam puanzar chibai buk turin an intlar thung ang.  Department hrang hrangte hna chanpual siamfel nghal a ni.

Minister of state K Lal­rinliana chuan a bial chhunga Bairabi North Branch YMA-in nimina YMA Hall-a kumin HSLC leh HSSLC-a pass tharte chawimawina hun an buatsaih a hmanpui a; Mizoram hausakna tam tak state páwna luang chhuak ṭhinte chu Mizoram chhung ngeia ṭangkai taka hman a nih thuai theih nan taimakna leh thiamna nen hma la thei turin zirlaite a fuih. HSLC pass thar 16 leh HSSLC pass thar mi 19 hnenah chawimawina hlan a ni.

Nimin Vanglaini chhuaka Ministry of Home Affairs-in kumina Independence Day hman dan tur Chief Secretary-te a hriattir chungchangah, parade contingent awm lo tur anga tarlan chu tihsual palh a ni a, kum dang ang thoin parade contingent an awm dawn a ni.

Zoram Medical College (ZMC)-ah nimin aṭang khan MBBS second year tan online theory, MCQ examination ṭan a ni. ZMC hian e-Learning Centre aṭangin online class an nei mek reng bawk.