Bangladesh ram aṭanga foreigner Mizorama lutte enfiah dan tur rêl

Bangladesh aṭanga India rama lutte ngun zawka enfiah leh thlithlai dan tur ngaihtuahin nimin khan Home secretary Lalrinliana Fanai hoin Bangladesh ramri depa awm Mizoram district pathuma sorkar hotute an ṭhukhawm.

Meeting-ah hian, Bangladesh ram aṭanga dan loa Mizorama pêm lut ṭhinte state sorkarin a ngaih thutak thu leh a theih chinah anmahni lo danga dapchhuak tur leh thawn haw tura theih­tawp chhuah tum a nih thu tarlan a ni a; international boundary vengtu BSF-te pawh phalna nei loa ramri kânte dap­chhuah kawngah nasa zawka ṭan la tura hriattir an ni.

Sorkar laipuia Ministry of Home Affairs (MHA)-in phalna nei loa Bangladesh mite thawn haw dan tur kaih­hruaina, November 23, 2009-a a siam tawh zûlzuia Special Task Force Committee, DC kaihhruaina hnuaia Mamit, Lunglei leh Lawngtlai district-a din tawh tihchangtlun leh chak zawka hna thawhtir dan tur meeting-ah hian rel a ni.

District Level Committee bakah, ramri kâna rawn lutte awlsam zawka hriat chhuah an nih theih nan civil sub-division level-ah committee hran din tum a ni a; chu committee-ah chuan civil sub-division chhunga SDO(C), BDO, Police, BSF leh khaw tina V/C president zawng zawng leh, tlawmngai pawl hrang hrangte tel tura beisei a ni.

Nimina meeting-ah hian Mizoram leh Bangladesh rîtu district-a DC leh SP te, Chakma Autonomous District Council hotute leh Border Security Force (BSF) hotute an tel a; YMA leh Young Chakma Association (YCA) hruaitute an tel bawk.