Rashtriya Ekta Diwas-ah thutiam chham

Rashtriya Ekta Diwas (National Unity Day) pualin nimin khan Mizoram hmun hrang hrangah hun hman a ni a; Aizawlah chuan Governor Lt.Gen. Nirbhay Sharma hoin Lammualah hman niin, sorkar hnathawkte'n thuriam an chham rual.

Larsap chuan, National Unity Day chu kum 2014 aṭangin kum tin Sardar Vallabhai Patel pian champha, October 31-ah India ram pumah hman ṭhin a nih thu a sawi a, "Sardar Vallabhai Patel hi India ramin zalenna a neih tirh aṭanga Union Home Minister leh Deputy Prime Minister hmasa ber a ni a, India zalenna atana sûlsutu leh India ram lal ram hrang hrang hnuaia awm inpumkhattirtu mi pawimawh tak a ni," a ti.

Governor chuan, Mizoramah hnam hrang hrang leh ngaihdan inang lo tak takte chengho mah ila, ram tana inunauna vawn nun zel a pawimawh tih sawiin, "Khawtlanga upa zawk te, politician-te tiamin chi leh chi inthliar zawnga engmah ti lo turin ka ngen a ni," a ti a; ṭhangthar lo la awm zel turte tan Mizoram impumkhat, hrisel leh changkang hnutchhiah tum ṭheuh turin mipuite a sáwm.

National Unity Day puala hun hmanah hian GAD thuchhuak angin, Mizoram sorkar hnathawkte tel tura tih an ni a, ram tana thutiam an chham rual. Mizoram Police, 1st Bn. MAP, CRPF, BSF leh Assam Rifles-te'n march past an entir a; sorkar Assam Rifles-te’n beating retreat-in hun an khâr a ni.

Unity Day pual hian nimin zing khan Sikulpuikawn aṭanga Lammual thleng ‘Run for Unity’ buatsaih a ni a, Governor-in a vai liam. Day hi district headquarters dangahte pawh hman a ni.