Hna thawk tha duh lote vangin mipuiin Sorkar hnathawk an hmu pelhè phah - Zodintluanga

Minister Zodintluanga chuan, sorkar hnathawk fel tak tak zingah hna thawk ṭha lo eng emaw zat an inzeh ve ṭhin thu sawiin, "Thawk ṭha lote hian sorkar hnathawkte an hmu pelhè phah fo," a ti.

Mizoram Secretariat Service Association (MSSA)-in nimina Synod Conference Centre-a inkhawmpui an neih a hmanpuinaah Zodintluanga chuan, "Sor­kar hnathawk zingah fel tak tak mi tam tak an awm a, chutiang karah chuan hna thawk ṭha lo eng emaw zat an lo inzep ve ṭhin. Hengte hian sorkar hnathawk ṭha duhte hmel a tichhe em em a, hengho vang hian mipui pawhin sorkar hnathawk an hmuh pelhê phah fo a ni," a ti.

Minister dinhmun aṭanga ram tana a thawh ve chhungin officer leh thawktu fel tak tak a tawng ṭeuh tawh tih sawiin Zodin­tluanga chuan, "Office tlai ngai lo leh báng hma ngai lo, bàn hun pawha hna la thawk tlat mai, bàn nacháng hrelo emaw tih mai tur ka hmu ve ta nual mai," a ti a; ṭha taka an hna thawkte chu an zahawm thu a sawi.

Zodintluanga chuan, minister-te chu rei lo te awma kal leh mai turte an nih thu sawiin, "Sorkar hnathawkte chu an pension hma chu an awm reng dawn a, sorkara kan hotu te, minister an ni emaw, secretary an ni emaw, kan finchhuahna kawngah thu lai la taka kan thiamna leh hriatna hman chhuah a ṭul a ni," a ti.

Minister chuan secretariat service chu India rama sorkar inrelbawlna kawngah a kila lung pawimawh tak an nih thu sawiin, "Sorkar dan hrang hrang zam leh kenkawh thuah te, service rules chungchangahte dinhmun pawimawh tak a chelh a ni. Chu dinhmun pawimawh tak mai luahtu chu nangni hi in ni," a ti a; sorkara minister-te leh sorkar ziaktu liante finchhuah kawngah an pawimawh thu a sawi.

MSSA inkhawmpui hi an vice president Lalringa Sailo-in a kaihruai a, president K Vanlalrawni'n thu a sawi. Chawhnu lamah hruaitu thar an thlang a ni.