MZP hruaitute'n mawhphurhna inhlân
Kum 2017-19 chhunga MZP general headquarters office bearer-a thlan tharte chuan hruaitu hluite aṭangin mawhphurhna an la ṭan a; nimin khan MZP pisaah mawhphurhna hlan inkhawm an hmang. Charge inhlanna inkhawm hi MZP adviser Lalhruaitluanga Chawngte-in a kaihruai a, president kal chhuak Lalsangzuala Ngente leh president thar L Ramdinliana Renthlei ten thu an sawi.
MZP President thar chuan, MZP-in Chakma zawng zawng an haw lo tih sawiin, "Dan dik loa ram dang aṭanga lo lut foreigner-te hi kan hua a ni. Central sorkarin India ram state tinte bawhzui turin mahni state-a foreigner-te zawng chhuaka enfiah turin order a chhuah tawh a, order hi Mizoram sorkarin an bawhzui miah lo hi hriatthiam har kan ti a, sorkarin an bawhzui theih nan MZP chuan hma kan la dawn a ni," a ti.
L Ramdinliana chuan, MZP-in Zo fate insuihkhawm leh lungrual taka kal zel an ngai pawimawh dawn thu leh, kum 2012 aṭanga an buaipui hlemhletna leh eirukna do leh, a dona hmanraw pawimawh Lokayukta din thuai a nih theih nan hma an lak dawn thu a sawi a; Mizoram hmun hrang hranga sorkar sikulah zirtirtu a rualkhai thei ang bera dah a nih theih nan hmalak an tum thu sawiin, "Zirlai pawl kan nih angin zirna kan ngai pawimawh dawn a, zirnain hma a sawn theih nan theihtawp kan chhuah dawn a ni," a ti.