Boruak inthlakthleng chungchang sawiho
Mizoram State Climate Change Cell leh NABARD Consultancy Services (NABCONS) ṭangkawp chuan nimin khan Secretariat conference hall-ah boruak, sik leh sa inthlak danglam mek hmachhawn dan tur zirhona, 'Capacity building programme on climate change adaptation in Mizoram' an buatsaih a, chief secretary Lalmalsawma'n a hmanpui.
Chief Secretary chuan, sik leh sa inthlak danglam chak takin tuilian, leimin, ruah tlak dan mumal lote a nghawng chhuak tih sawiin, "Hengte hian mihring khawsaknaah chhiatna leh harsatna tam tak a thlen mek a, Himalaya tlangdung ram dangte ang bawkin Mizoram pawhin a takin kan tuar ve mek a ni," a ti.
Lalmalsawma chuan, chak taka boruak lum zelin tun aṭanga hun rei lo têah khawvel ram hrang hranga mihring maktaduai tél khawsakna a tihbuai zel dan turte ngaihtuahna nen, Mizoramin harsatna a tawh theih tur te uluk taka lo thlir lâwk a, a hmachhawn dan tura inbuatsaih a pawimawh thu a sawi bawk.
Indian Himalayas Climate Adaptation Programme (IHCAP), New Delhi-a science policy officer Dr Divya Mohan chuan, Himachal Pradesh Kulu district-a ruahtui tlak dan te, khuarel chhiatna chi hrang hrang thlen dan leh an tawrh natna laite hre chiang tura baseline data an neih dan te, chumi aṭanga Mizoram tana hman ṭangkai ve theih turte a sawifiah a ni.