Bial 40-ah candidate kan nei dawn - BJP General Secretary

Mizoram tlawha chám mek BJP national secretary Hayithung Bill Lotha chuan, kum 2018-a Mizoram Assembly inthlan awm turah BJP chuan Mizorama constituency zawng zawng, bial 40-ah candidate dah vek an tum thu a sawi.

Hayithung Bill Lotha hian tun hnaia Aijal Club-a thu a sawinaah, MLA inthlanpui lo awm tur atan an buatsaihna kal mek avanga Mizoram rawn tlawh a nih thu a sawi a, "MLA bial tinte chu thawh hniha tlawh chhuah vek a tum a ni. Bial ruk ka tlawh tawhnaah mipuite dinhmun a chhe hle a, ni tin mamawh - tui, eirawngbawlna gas leh electric supply a chhe hle a, kawngpui pawh suangtuah phâk bakin a chhia a ni," a ti.

Kum 2018-a MLA inthlanpui lo awm tur­ah hmasawnna thuchah chauh mipuite hnenah an ken thu sawiin BJP General Secretary chuan, "Candidate 40 theh chhuah tum mah se, party mala inthlan hmachhawn kan tum. Inthlan zawhah party mala sorkar kan siam zo dawn lo a nih chuan tualṭo party-te nena thawhho kan hnial lo," a ti a; hetih lai hian, Chief Minister candidate siam an tum loh thu a sawi.

Hayithung Bill Lotha chuan, Mizoram chief minister Lal Thanhawla chu India rama CM zing­ah corrupt berte zinga a mi a nia sawiin, "Congress sorkarah sum tih­chingpenna ṭhahnem tak a awm. Mizoram lottery sumte chu khaw nge a awm zawh tak? Dan loa Mizorama pém lutte chungchangah Mizoram sorkar hi a hlawhchham a ni," a ti.