Agri. Minister-in lo neitute hman tur tractor vai liam
Sub-Mission on Agriculture Mechanisation (SMAM) leh RKVY aṭanga lei, Mizorama lo neitu intélkhawm (farming society)-te hman tur tructor 12 chu nimin khan Agriculture directorate kawt aṭangin Agriculture minister KS Thanga'n a vai liam.
KS Thanga chuan, SMUM leh RKVY scheme hnuaiah custom hiring centre 58 din a nih tawh tih a sawi a, "Scheme-in a tum ber chu, kut hnathawktute'n hlâwk zawk leh awlsam zawka hna an thawh hi a ni. Link road km. 450 chuang laih zawh tawh a ni a, NEDP sum hmangin Mizoram pumah agriculture link road kawng thar km. 400 laihna tur cheng nuai 2012 dah a ni," a ti.
Agriculture Minister chuan, state dang tam takah an hlawhchhampui SMUM leh RKVY chu Mizoramah chuan kut hnathawktute'n an hlawhtlinpui tih sawiin, "State dangte nena he scheme thlirletnaah pawh Mizoram chu scheme-a hlawhtling ber pawla ngaih a ni," a ti a; khawl hman ṭangkaina leh a thawm ṭhat kawngah pawh Mizoramin fak a hlawh hle niin a sawi.
Agriculture department hian kut hnathawktute tan tractor 72 a sem chhuak tawh a; tractor an pek chhuahte hian rotivator, trailer leh paddy reaper-te a keng tel.
Nimina tractor sem chhuahte hi Phuaibung Farmers Association, Khualui MI Project Water Society, FMC Vaphai - Saikhumphai II, FMC Phaithlang zau - Hmunhmelṭha, FMC Tuisen - Khawzawl, FMC Farkawn, Oil Palm Grower Association - Nalzawl, FMC Keiṭum, Mat ral WRC Society - Lungbu Zau, FMC E Lungdar, Tuidam zau - Phullen, Agriculture Farmers Society - Suangpuilawn, FMC - Lungchhuan, WRC Farming Society - Sialhawktea hman tur a ni.
Society leh association hnuaiah hian kut hnathawktu chhungkua 643 an awm a ni.