Lalchhandama Ralte-in Zokhawthara lirnghingin A tihchhiatte a tlawh

Minister of state Lalchhan­dama Ralte chuan nimin khan Zokhawthar a tlawh a, tun hnaia lìrnghîngin sikul leh biak-in a tihchhiatte leh zirna hmunhmate a tlawh.

Lalchhandama Ralte chuan, tun hnaia lirnghing vanga chhiat­na an tawhah Mizoram mipui leh sorkarin Zokhawthar mipui an tawrhpui tak zet tih sawiin, "Biak-in hial ṭhiah ngaite hian mipui thinlung a khawih tak meuh a ni,"  a ti a; Zokhawthar mipui manganna tuam dam turin sorkarin a tih theih ang ang a tih dawn thu a sawi.

Sorkarin hmasawnna hna thawh tak tak tumin, kumin kum tìr aṭangin ruahmanna a siam tih sawiin Lalchhandama chuan, "Budget session pawh February thlaah neih a ni a, SEDP lamah pawh a tak taka ke pên tuma ruahmanna siam a nih laiin Covid-19 in min tibuai ta a, sorkar hmachhawpte chu a châwl rih. Hripui laka mipui himna tur leh ei leh bàr lama tlachham loa mipui kan awmna tur chu ngaih pawimawh a ngai leh ta rih a ni," a ti. Biak-in chhiatna hmun a tlawhnaah hian Lalchhandama Ralte chuan, hnatlan nan tiin kohhran hruaitute hnenah pawisa a hlân. Minister hi MLA C Lal­muanpuia'n a ṭawiawm a ni.