MPC policy pui - Buh leh bâla intodelh

MPC senior vice president Vanlalhlana chuan, MPC party policy laipui ber pakhat chu Zo fate buh leh bâla intodelhna a nih thu leh, MPC telna Zoram Peoples' Movement (ZPM)-in kalphung thar a zawrh hnuaiah mipuite'n an dikna leh chanvo changin, sorkar inrelbawlna ṭha a awm dawn thu a sawi.

Vanlalhlana hian nimina MPC pisaa inkhawmah thu sawiin, buh leh bala intodelh tihpuitling turin an hotute'n Mizorama leileta buh thar theihna tur hmun remchang an dap chhuak vek tih a sawi a, "Leilet buh thar theihna tur ram hectare 6,500-a zau an hmu chhuak a, kawlphetha chakna leh ruahtui hmang­a kum khata leilet buh vawi hnih thar theihna tura ruahmanna siam leh kalpui a ni. Congress leh MNF sorkarin an chhunzawm loh avangin vawiin thlengin buh leh bâlah kan ram a la intodelh lo hi a pawi em em a ni," a ti.

Vanlalhlana chuan, Congress leh MNF party-te an sorkar chhung­a rorelna an kalpui dik loh vanga mipuiin ngaia an neih hman hial tawh chu ZPM Ṭangrual Pawl chuan an her rem leh dawn tih a sawi a, "Kalphung tharah chuan mipuite'n an dikna leh chanvo an chang tawh ang a, sorkar inrelbawlna ṭha Zoramin kan nei tawh dawn a ni," a ti bawk.

Thu sawitu dang Dr B Thangdailova chuan, ZPM chu Steering Committee leh Val Upa Council (VUC)-te kaihhruaina hnuaiah lungrual takin mipui sorkar siam turin hma kan la mek tih a sawi a, "Val Upa Council kaihhruaina hnuaiah mipuite beisei, mipui sorkar kan din ngei dawn a ni," a ti.