KHAWTHLIR

CM-in lawmpui
October 21- 28, 2017 chhunga Colombo, Sri Lanka-a neih, Asia Pacific Choir Games and Grand Prix of Nations-a Gold Diploma pathum dawng a, Champion of the Champions nihna hauh Mizo Cardinal Choir member-te chu October 30, Thawhṭanni tlai khan CMO pisaah chief minister Lal Thanhawla'n lawmpuina thingpui a inpui. Chief Minister chuan, an hlawhtlinna chu khawvel huap a nih mai bakah, mi dangte hmaa Mizote tihmingṭhatu an nih thu a hrilh. Asia Pacific Choir Games and Grand Prix of Nations-ah hian ram 17 aṭangin zaipawl 77 an intihsiak a ni.

Open Bible Stories
Bibles for the World buatsaih 'Open Bible Stories - Parallel Edition, Mizo & English’ chu October 30, Thawhṭanni zan khan Ramhlun Indoor Stadium-ah K Lalrinthanga, MLA-in a tlangzarh. Lehkhabu hi Bible-a thawnthu ngaihnawm zualte milem telin Mizo ṭawng leh Sap ṭawnga chhut a ni.

Hall hawng
MNF ṭhalai president Lalrinawma, MLA chuan a MLA fund hmanga a bial chhung, Buhkangkâwn khuaa sak public hall chu nimin khan a hawng. Hall hawnna inkhawmah Lalrinawma chuan, Buhkangkawn khaw mite chu neitu thinlung pu tura chahin, "Sorkar sum lo kalte hi mipuite vanga lo awm, mipuite sum a ni a, mipuite'n a hlutna kan hriat a ṭul hle a ni," a ti. Hall sak nan hian Lalrin­awma hian MLA fund Rs. 3,10,000 a pe a ni.

Tanpuina sem
AH&Vety department chuan nimin khan Siahaah RKVY Backyard Poultry Farming ṭanpuina mi 11 hnenah Rs. 50,000 ṭheuh an sem a, ṭanpuina dawngtute chu training pek nghal a ni. Ṭanpuina hi sum fai bakah, subsidy-in ar note pakhat Rs. 30 zelin ar note 600 sem chhuah a ni.