Hnahthialah LAD notification an hâl Mi 50 velin chaw an nghei ṭan

Mizoram sorkara Local Administration department (LAD)-in tun hnaia Hnahthial South-III Village Council pianna tura Notification a tihchhuah chu Lungleng Veng JAC chuan duh loin, nimin khan notification copy an hâl a, mi eng emaw zatin chaw an nghei ṭan bawk.

Thu dawn danin, Hnahthial South-III VC tharah hian Hnahthial Lungleng veng tam zawk behtir an ni a, Hnahthial South-I lama mi ṭhenkhat behtir an ni bawk. Hnahthial South-III VC siam tum dan chu duh loin Lungleng Veng JAC chuan hma an la a, bialtu MLA Dr R Lalthangliana leh LAD minister K Lalrinliana te hnenah an thlen a ni.

Sorkar hotute hnena an thlen chunga thu lawmawm an hriat loh avangin vawiin khan khawtlang mipui ko khawmin, notification copy an hâl a, nimin tlai aṭang khan ṭhalai 50 velin chaw an nghei ṭan bawk. Lungleng Veng JAC-te chuan nimin khan press conference an nei a, Hnahthial South-III VC a piang chu Hnahthial hmasawnna leh hma lam pana ke penna kawng pawimawh tak a nih avangin lawmawm an tih thu an sawi a, "VC tharah hian Lungleng Veng zatve aia tam, chhungkaw 70 an awm dawn a, VC hluiah in 60 vel kan awm dawn a, VC pahnihah ṭhen darh kan ni dawn. Hei hian kohhran leh khawtlang inrêlbàwlna leh inenkawlna hrang hrangah nghawng ṭha lo leh harsatna tam tak min siam dawn a, kan duh lo a ni," an ti.

Hnahthial South-III VC ramri siam chu Lungleng Veng nuaibo tumna a nih avangin an pawm thei lo tih sawiin, "Lungleng veng ṭhen darh a nih dawn ai chuan, Hnahthial South-III VC hnuaiah Lungleng veng pumpui awm vek law law kan duh," an ti a; an duhna chu tihhlawhtlinsak turin sorkar an ngen nawn leh a ni.