MNF diamond jubilee lawmna khâr a ni ; Remna tluantling kan neih hi export tur hlu ber, kan neih chhun a ni - Zorama

Mizo National Front (MNF) party chuan October 22, Inrinni khan an party kum 60-na, diamond jubilee kum khat chhung an lawm khârna hun an hmang. MNF president Zoramthanga chuan, Mizoramin remna tluantling a neih chu a thawn chhuah tur hlu ber leh a neih chhun a nih thu a sawi.

March 1, 1966-a MNF-in independence an puanna hmun, Mission Venga C Rochhinga in kawta hriatrengna lungphun an siam chu Inrinni zing khan MNF president Zoram­thanga'n a hawng a; thu sawiin, "Keini chuan export tur eng mah kan nei lo. Remna tluantling kan neih hi export tur hlu ber, kan neih chhun chu a ni," a ti.

Zoramthanga chuan, March 1, 1966-a Mizoram independence an puan chu a hun laiin ropui lo mah se, a thâwm a lian hle tih a sawi a; rambuai lai chungchangah, Laldenga hoa India nen indàwrnaah Preamble siam a nih laiin an tel ve lohna Constitution an siam a, barh luih an nih avangin India sorkar an hnial thu a sawi.

Union Home Minister, Assam Chief Minister leh Laldenga ten Shillong-ah inremna an siam a, Laldenga'n 'Silai kan hmang lo ang' a tih laiin February 1966 aṭangin Mizoramah sipai tirh luh belh zel a ni tih sawiin Zoramthanga chuan, "Hetiang a nih avang hian silai kenga zalenna sual a ngai ta. India Consitution lak aṭangin tu mahin min phelh dawn lo. Hemi laka tâl chhuak turin independence kan puang ta a, kum 20 zet zalenna kan sual a ni," a ti.

MNF President chuan, Mizoram mipui leh kohhrante'n inremna an duh avangin inremna ziah a nih thu leh Mizoram pual bikin Indian Consitution-ah Article 371-G siam a nih thu a sawi a, "South east Asia huap pawhin MNF leh India inremna aia inremna hlawhtling hi khawiah nge awm?" a ti a; Article 371-G ang chu America sorkar pawhin a neih loh thu a sawi.

C Rochhinga (L) in kawta independence puan hriatrengna lungphun hawnnaah hian C Rochhinga fanu Remliani Chawngthu-te pawhin thu an sawi a ni.

Inrinni zing vêk khan Mizoram hmun ṭhenkhatah MNF diamond jubilee lung­phun hawnna hun hman a ni a, MNF Gen. Hqrs hruaitute'n an hmanpui. Phunchawng dáia lungphun hawngtu MNF senior vice president Tawnluia chuan, MNF chuan Pathian hming an lam hmasa ṭhin nia sawiin, "Khawvela political party awm zingah Lalpa hming lam hmasa an awm ve ka ring lo," a ti.

Inrinni chhun khan Vanapa Hall-an MNF diamond jubilee khârna inkhawm buatsaih a ni a, Zoramthanga leh Tawnluia bakah, MNF dintu Laldenga (L) nupui Lalbiakdiki ten thu an sawi. Ram leh hnam tan an ṭawngṭai rual a, ram tana martarte sûnna hun hman a ni bawk.

Zoramthanga chuan, Mizote tuna Mizorama Pathianin a dah chhan chu chanchin ṭha hril tura a duh vang nia sawiin, "Pathianin Mizote hmangaih taka min hruaina zawng zawng hi MNF ṭhat vang emaw, Congress ṭhat vang emaw a ni lo a, vana a làwn dawna Isua'n min chah, chanchin ṭha hril tura he hnam hi min duh vang a ni," a ti.

MNF diamond jubilee lawmna hi October 22, 2021 khan hawn a ni a, kum khat chhung kawng hrang hranga an lawm hnuah October 22, 2022 khan an khâr a ni.