Mission Veng kum 125-na lawm a ni

Mission Veng chuan October 22, Inrinni khan niléngin an veng kum 125-na an lawm. Mission Veng kum 125-na tlin champha hi nimin October 23 kha a ni a, Pathianni a nih avangin Inrinni khan a lawmna pui ber an hmang a ni.

Mission Veng kum 125-na lawmna atan Inrinni zing karah khan Banglapui tualah MUP kaihhruaiin jubilee dár an vua a, chawhma dar 10-ah Mission Veng Local Council chairman Ramengmawia Ralte-in kum 125-na hriatrengna lungphun a hawng a, Rev. C Rosiama'n ṭawngṭaiin a hlan.

Chhûn lamah niléngin Mission Veng Kohhran Hall-ah kum 125-na an lawm a, hun hlimawm tak tak hman a ni a, kum 125-na puala souvenir siam tlangzarh a nih bakah, an veng mi chhuanawm bikte hnenah chawimawina hlan a ni.

Mission Veng dintua ngaih Rev. DE Jones (Zosaphluia) bakah, Rev. FW Savidge (Sapupa) leh Rev. JH Lorraine (Pu Buanga) te chu October 23, 1897 khan Thingpuihuan Tlang, MacDonald Hill aṭangin tuna Banglapui hmunah hian an insuan a, chu chu Mission Veng din ní-ah pawm a ni. Kum 125-na lawmna hi kumin September 8, 2022 zan khan ṭan a ni a, kawng chi hrang hrangin an lawm tawh a, December 2, 2022-ah an khâr ang.