CYMA leh CYLA hruaitute'n Myanmar Ráltlânte ṭanpui turin US sorkar an ngen

Central YMA leh Central Young Lai Association (CYLA) hruaitu ṭhenkhat chu USA-ah an zin a, Myanmar aṭanga Mizorama ráltlânte chungchanga an hmalakna leh ṭanpuina awm theite October 21, Zirtawpni khan Washington DC-ah US State department hnuaia Bureau of Population, Refugees and Migration hotute an sawipui.

CYMA hruaitute hi president R Lalngheta leh assistant secretary Prof. Malsawmliana te an ni a, CYLA aṭangin president HC Vanlal­ruatpuia a tel thung a; Chin Association of Maryland execu­tive director Zo Tum Hmung leh advisor Matthew Wilch ten an ṭawiawm a ni.

US State department-a Bureau of Population, Refugees and Migration (PRM) aṭangin Asian team leader Hoa Tran, Burma unit chief Jack Dart, PRM programme officer Julien Kreuze, PRM program analyst Meredith Houck leh India Political-External Unit-a mi Rajani Ghosh te an tel.

CYMA leh CYLA hruaitute chuan, Myanmar aṭanga raltlante Mizoram sorkar leh mipuiin an buaipui dan leh dawnsawn dante chipchiar takin an sawi a; US sorkarin palai tír a, Mizorama ráltlante dinhmun a hmun ngeia hmuhpui tur leh ṭanpuina awm thei angte pe turin an ngen a ni.

PRM Asian team leader Hoa Tran chuan, Myanmar aṭanga ráltlante Mizoramin a buaipui dan chu ropui a tih thu YMA leh YLA hruaitute a hrilh a; ráltlante an awmna hmun ngeia tlawh chu ṭha an tih thu leh tlawh turin aiawh intirh an tum thu a sawi. Ráltlante ṭanpui turin kawng zawn an tum thu a sawi bawk.