Vairengteah kawng dan a ni dawn ; Zangnadawmna chingfel vat turin minister-in thuneitute a hriattir

Vairengte leh Sairang inkar kawng, National Highway zauh turah zangna­dawmna chingfel thuai turin Environment Forest & Climate Changte (EFCC) Minister chuan Kolasib Bawrhsap leh zangnadawmna buaipui tura ruat CALA (Kolasib Additional DC)-te a hriattir. Hetih lai hian, Land Owners' Association (Vairengte-Kawnpui Package 3-6 NH 06 & 306) chuan naktuk hian Vairengteah kawngpui dan an tum.

October 22, Inrinni khan zangnadawmna pek chhuah a la nih loh chungchangah EFCC minister TJ Lalnuntluanga hoin Kolasib DC, CALA, Kolasib DFO, NHIDCL hotute leh sorkar official dangte an ṭhukhawm a; EFCC Minister chuan, Kolasib DC leh CALA chu a rang lama zangna­dawmna chingfel turin a hriattir a ni.

Land Owners' Asso­ciation (Vairengte-Kawn­pui Package 3-6 NH 06 & 306) joint meeting, Kolasib-a October 11, 2022-a neih chuan, NH kawngpui zauh turah October 24, 2022 thlenga zangnadawmna sum sem a nih loh chuan Mizoram luhka pawi­mawh, Vairengte-Aizawl kawngpui dan (road block) an rêl.

LOWA Vairengte-Kawnpui chuan, zangna­dawmna sum chu Mizo- ram sorkar sum a ni lo a, sorkar laipui sum, ram neitute chanvo atana rawn kal a nih thu sawiin, "CALA account-ah July 8, 2022 khan an transfer (thun) tawh a, pawisa hi land owner-te hnenah vawiin thleng hian sem lohin a la awm a ni," an ti.

Hetih lai hian, Kolasib DC chuan vawiin hian Land Owners' Association (Vairengte-Kawnpui Package 3-6 NH 06 & 306) hruaitute a kâwm dawn a, kawngpui dang lo turin a ngen rin a ni.