Children's Science Congress zawh a ni

Mizoram pum huap Children's Science Cong­ress vawi 30-na chu October 21, 2022 khan School Education directorate conference hall-ah zawh a ni a; a khàrna inkhawm hman­puitu School Education minister Lalchhandama Ralte chuan, Mizoram sorkarin science zirna tihhmasawn nan ṭan a la mek tih a sawi.

Children's Science Congress-ah hian district tin aiawh an tel kim a; sikul 35 aṭangin project 37-ah child scien­tist-te'n kumina thupui, 'Understanding ecosystem for health and well-being' tihbehchhana an thil zirbingte an pho chhuakin an sawifiah a ni.

Minister Lalchhan­dama Ralte chuan, Mizoram sorkarin science zirna tihhmasawn nan ṭan a la mek tih sawiin, "Bi-lingual textbook tihchhuah a ni dawn a, science leh mathematics zirlaibute chu English leh Mizo ṭawngin bu khatah siam mek a ni a, November thla tawpah tihchhuah hman beisei a ni," a ti.

Tun hnaia JEE result chhuakah Mizo panga chu Indian Institute of Technology-a zir turin an inziak tling tih sawiin Lalchhandama chuan, "An zinga pakhat phei chuan 99.17% a hmu phâk a ni. Mi dangin an tih theih chu Mizote'n mahni bu záwl aṭangin a tih ve theih tih a tichiang a, a lawmawm hle," a ti a; MBSE syllabus chu NCERT syllabus nen inan reng thu te, exam dan phung pawh siamṭhat zel a nih thu te, zirlaite thiamna tak tak sáwr chhuak turin intuaithar zel a nih thute a sawi bawk.

State Level Children's Science Congress aṭang hian January 27-31, 2023 chhunga Ahmedabad-a neih tur National Children's Science Congress-a tel tur pariat thlan a ni a; January 3-7, 2023 chhunga RTM Nagpur University, Maharashtra-a neih tur Indian Science Congress-a tel tur pahnih thlan a ni bawk.

Science Congress khârnaah hian Samagra Shiksha officer te, Science Teachers Association Mizoram hruaitu te, district tin aṭangin guide teacher-te leh evaluator-te an tel a ni.

SCIENCE CONGRESS-A TEL TURTE
Children's Science Congress (Senior)
1. Nancy Lalkhawpuimawii, Saitual H/S
2. VB Khochai Zahneichhua, Lorrain English School, Siaha
3. T Lalremsangi, Tualte H/S
4. Valeric JH Lalchhanhimi, Ruantlang H/S
5. KC Lalpeksangi, Bethlehem Vengthlang H/S
6. Lalrinnungi Ralte, Marian H/S

Children's Science Congress (Junior)
1. Lalrinzuali Ralte, Saihnuni Sailo Memorial School
2. Martina Sonarung, Mamit M/S-II

Indian Science Congress
1. PC Lalremsiami, Buhban Secondary School
2. Lalnunthara, Mizo High School