Covid vanga police lâk belh theih loh Home minister Chama'n hrehawm a ti

October 17-21, 2022 chhunga Mizoram Police Sports Meet vawi 20-na buatsaih chu October 21 khan Rajiv Gandhi Stadium-ah khâr a ni. Khàrna inkhawm hi Home minister Lalchamliana'n a hmanpui a, Mizoram police recruitment chu Covid-19 vangin tih theih a nih rih loh tur thu leh an tum dan anga tih theih a ni lo chu hrehawm a tih thu a sawi.

Mizoram Police Sports Meet hi kum 1987-ah neih ṭan a ni a; kumina Police Sports Meet-ah hian police unit hrang hrang aṭangin contingent 11 telin, an vaiin mi 1,114 an ni. Infiamna chi hrang hrang 84-ah an intihsiak a, Central Range chu pakhatna an ni.

Home Minister chuan, Mizoram police-te inpekna leh thawhho ṭha avangin mipui rin an hlawh tih sawiin, "Kawng engkimah Mizote tan kaihruaitu leh entawn tlak ni turin mahni inthunun leh taimakna ngai pawimawh zel ang che u," a ti.

Lalchamliana chuan, Mizoram police zinga infiamna thei zualte chu sorkarin a remchan dan ang zelin duhsakna (reward, promotion, etc.) a pe tawh ṭhin tih a sawi a; Covid-19 avangin police lak theih a nih rih loh tur thu a sawi rualin, an tum dan anga tih theih a ni lo chu hrehawm a tih thu a sawi bawk.

Director general of police Davesh Chandra Srivastva pawhin thu sawiin, infiamna chi hrang hranga telte chu taksa hriselna lamah ṭang sauh sauh turin a fuih a ni.

Mizoram Police Sports Meet 2022 khârna inkhawmah hian Organising Committee patron John Neihlaia, IGP(Headquarters) leh chairman Lalbiakthanga Khiangte, DIGP (Headquarters)-te bakah, mi pawimawh dangte an tel a ni.