Tuichawngchhuaha chhungkaw 49 sawn chhuah chungchang sawiho

Lunglei District Screening Committee on Unauthorized Settlement chuan an chairman Kulothungan A, district bawrhsap kaihhruaiin dan loa din Tuichawngchhuah khua aṭanga sawn chhuah chhungkaw 49-te dinhmun leh hmalak ṭulte an sawiho.

Lunglei DLAO PC Zonuntluangi tarlan danin, September 26-29, 2022 chhungin chhungkua 49 dinhmun zir chianna (spot verification) neih a ni a; Tuichawngchhuah aṭanga Tuichawng khuaa sawn chhungkaw 49 zinga 35 chu Tuichawngah an la awm a, chhungkaw dangte chu khaw hrang hrang an pém chhuak tawh. Chhungkaw 17 hnenah PMAY(G) hnuaiah in sak ṭanpuina pek tawh a ni.

Ṭhutkhawmah hian, in sak ṭanpuina la dawng lo chhungkuate hnenah ṭanpuina pek an rél a; naupang pasarih sikul kal lo (drop out)-te pawh sikul kaltir leh ngei ni se, an ti a, mawhphur turin School Education department an ruat.

Tui leh kawlphetha an dawn ṭhat thu te, Health department aṭangin vaccine, DDT leh LLIN thosi lênte pek a nih tawh thu te, MGNREGS hnuaiah job card leh ration card siamsak an nih tawh thute tarlan a ni.

Ṭhutkhawmah hian LAD, Rural Development, School Education, EFCC, Land Revenue & Settlement leh Health department aiawhte bakah, Tuichawng khaw­tlang hruaitute an tel.