KHAWTHLIR

Thisen pe
October 22, Inrinni khan Aizawl City PYD (UPC-NEI) chuan Civil Hospital, Aizawl blood bank-ah thisen unit 59 an pe a; KṬP, Bethlehem North Branch pawhin Civil Hospital tan an kohhran hall-ah unit 31 an pe. KṬP, College Veng Branch chuan an din champha vawi 44-na pualin Synod Hospital tan thisen unit 30 an pe a, petute mipa 24 leh hmeichhia paruk an ni a; Kolasib Hmarveng Branch YMA pawhin an din champha vawi 75-na pualin Kolasib District Hospital tan unit 49 an pe a, petute mipa 31 leh hmeichhia 18 an ni.

CVSAH Week
Central Agricultural University hnuaia College of Veterinary Sciences & Animal Husbandry, Selesih chuan October 18-21, 2022 chhung khan Annual College Week vawi 21-na an college-ah an hmang a, infiamna chi hrang hrang an nei. October 21 khan CVSAH auditorium-ah Week khârna hun hman niin, minister Dr R Lalthangliana'n a hmanpui. Minister chuan Mizoram chu India rama state ralmuang ber a nih thu leh Kerala dawta literacy rate sanna ber a nih thu sawiin, "Pakhatna ni turin ṭan kan lak zel a pawimawh a ni," a ti. CVSAH hi kum 1998-ah hawn a ni a, tunah chuan Ph.D. zirna thlengin a awm tawh a, department 17 awmin, zirlai 400 chuang an awm mek a ni.

MNF dintu tlawh
MNF diamond jubilee khârna hun hman pualin MNYF hruaitute chuan MNF dintute zinga la dam awm chhun C Hermana, Mission Veng chu October 22, Inrinni khan a chenna inah an hmu a, MNYF president L Thangmawia'n jubili t-shirt leh MNF signatory Zoramthanga lehkhabu 'Zoram zalen nan hming ka sign' tih a hlân.

Political training
ZPM party-a Dampa East Block chuan October 22, Inrinni khan Darlungah political training thawh hnihna an buatsaih a, Aizawl aṭangin PAC member Isak Malsawma leh, general secretary pahnih B Lalchhanzova leh C Lalthanfela ten an hmanpui. Training-ah hian Reiek, Darlung, Khawrihním, Lungphun, Hreichuk, Bâwngthah, South Sabual leh Báwlte aṭangin party hruaitute an tel a ni.