Covid-19 vei mi 52 an awm mek

October 21-22, ni hnih chhungin Mizoramah Covid-19 vei mi 15 hmuh chhuah a ni. Hripui vei dam tawh Inrinni khan mi 10 leh nimin khan mi pasarih chhuahtir an ni a, hripui vanga thi an awm lo. Nimin tlai khan Covid-19 positive mi 52 an awm.

IDSP aṭanga thu dawn danin, October 21, Zirtawpni khan swab sample 185 endik aṭangin Covid-19 vei mi 11 hmuh chhuah a ni a, positivity rate 5.95% a ni. Khawzawl district-ah mi panga, Aizawl district-ah mi pali leh Lunglei district-ah mi pahnih hmuh a ni.

Inrinni khan sample 129 endik aṭangin Covid-19 positive mi pali chiah hmuh chhuah a ni a, positivity rate pawh 3.1% chiah a tling. Hripui vei hmuh chhuahte chu Aizawl district-a mi pahnih leh Mamit leh Saitual district-a mi pakhat ve ve an ni.

Mizoramah swab sample 19,87,092 endik tawh niin, Covid-19 vei 2,38,746 hmuh chhuah a ni tawh a, 12.02% a ni. Nimin tlai dar 4 thlengin mi 2,37,971 (99.68%) chhuahtir an ni tawh a, mi 723 (0.30%) thi tawhin, enkawl mek mi 52 (0.02%) an awm.

Mizorama district 11 zinga district pali - Siaha, Kolasib, Lawngtlai leh Hnahthial district-ahte Covid-19 vei an awm tawh rih lo a; positive mek mi 10 aia tam awmna Aizawl leh Khawzawl district-te a awm a ni.