Phawngpui tlanga thing kita zaitute Hrem turin YLA-in sorkar an phût

Young Lai Asso­ciation (YLA) Sub-Headquarters, Sangau chuan, Environment, Forest & Climate Change (EFCC) department mi nia hriatte'n Phawngpui National Park (Sanctuary) huam chhung, Pangrang khaw hlui bul ngawa thingte an kit a, an zaitir nia sawi chu an dem tak zek thu an tarlang a; thing kita zaitute hrem ngei turin sorkar an phût.

YLA sub-hqrs, Sangau chuan thuchhuah siamin, July 23, 2020 zana ZONET Cable TV chanchin tharah, Phawng­pui tláng, Pangrang khaw hlui bul ngawa thingte EFCC department hotu­te'n kihtirin an zaitir thu puan a ni tih an tarlang a, "Hetianga an ti hi pawi kan ti a, thil sual titute kan dem tak zet a ni," an ti. 

Phawngpui tláng chu Mizoram tlangsang ber a nih angin, a chhunga cheng nungchate leh thing leh maute chu YLA-in hun rei tak aṭang tawhin an humhalh tlat ṭhin tih sawiin Sangau YLA chuan, "Ram rohlu pakhat pawimawh tak mai an suasam leh thing leh maute an tichereu hi nasa takin kan do a ni," an ti a; Phawngpui tlang chu an theih ang anga vèna humhalh zel an tum thu an sawi.

Sangau YLA chuan, Phawngpui National Park chhunga thing kih leh zai chungchang chu a theih ang angin an chhui zui tih sawiin, thing kih leh zai phènah thil fel lo tam tak a inphùm rûk a rin thu an sawi a, "Sorkarin a mawhphurtu chungah dan ang takin a na thei ang bera action a lak kan phût. A phèna thil dik lo, lo inhnamhnawih ve an awma rinhlelh chungchangah pawh sorkarin a rang lama a chhui zui a, an chungah dan ang taka action a lak kan phût bawk," an ti.

An phût anga sorkarin a rang lama a chhui zui lo emaw, action a la lo emaw a nih chuan YLA Sub-Headquarters, Sangau-in a ṭul anga an bawhzui tur thu an puang nghal a ni.