Mizoramah HIV+ve 25,982 hmuh tawh a ni ; HIV/AIDS vangin mi 3,506 an thi tawh

Mizoramah kum 2005 aṭanga kumin March thla thleng khan HIV vei mi 25,982 hmuh chhuah a ni tawh a; HIV/AIDS vangin mi 3,506 an thi tawh. HIV+ve hmuh tawh zinga 65% vel chu mipat hmei­chhiatna hman aṭanga kái an ni.

HIV/AIDS donaa hma latu ber Mizoram State AIDS Control Society (MSACS) chhinchhiah danin, Mizoramah mi 8,97,802-te thisen endik a ni tawh a, chuta ṭang chuan HIV vei mi 25,982 hmuh chhuah tawh niin, endik zat aṭangin 2.89% a tling. Thisen endik zingah endik nawn eng emaw zat an awm avangin, endik zat hi mihring zat erawh a ni lo.

Thisen endik zat 8,97,802 zinga 5,93,599 (66.12%) chu mi náwlpui (general client) an ni a, mi 3,04,203 (33.88%) erawh chu nu, nau pâi endikte bik an ni. General client zingah HIV+ve mi 23,755 hmuh chhuah a ni a, chu chu 4% a tling. Nu nau pâi endik zinga mi 2,227-in HIV an vei a, endik zat aṭangin 0.73% a ni.

HIV positive hmuh chhuah tam ber kum, 2018-19 (financial year) khan mi 65,621 endik aṭangin positive mi 2,765 hmuh chhuah a ni a, positive percentage pawh 4.21 a tling. Positive percentage a san ber kum erawh chu kum 2005-06 kha a ni a, mi 7,770 endikah mi 378 hmuh chhuah niin, 4.86% a tling.

HIV vei general client bikah MSACS-in kum a ṭhen danah kum 25-34 inkar tam berin, 10,005 (42.12%) an ni a, kum 35-49 inkarin dawtin, mi 6,432 (27.08%) an ni. Kum 14 hnuai lam mi 677 (2.85%), kum 15-24 inkar mi 5,290 (22.27%) leh kum 50 chung lam mi 1,351 (5.69%) an awm bawk.

HIV+ve hmuh chhuah tawh zinga 17,917-in anti retroviral therapy (ART) an la tawh a, chungte chu mipa 10,481, 6,890 leh naupang 546 an ni a; ART la la lo, la tura ziah luh tawh mipa 12,081, hmeichhia 7,852 leh naupang 609, an vaiin mi 20,542 an awm.

MSACS chhinchhiah danin, March 31, 2022 thlengin Mizoramah HIV/AIDS vangin mi 3,506 an thi tawh a, chungte chu mipa 2,250 (64.18%), hmeichhia 1,187 (33.86%) leh naupang 69 (1.97%) an ni. Tun hnaia tihchhuah tâk Mizoram Statistical Abstract 2021-a a lan danin, tun hnai kum 10 kal ta, 2011-12 leh 2020-21 inkar chhung khan HIV/AIDS vangin mi 2,652 an thi a, thi an tam ber kum, 2017-18 khan mi 716 an thi. Kum 2019-20 chhunga thi zat erawh tarlan a ni lo.

Kum 2020-21 chhung bikah HIV/AIDS vangin mi 190 an thi a, chu'ng zinga a tam ber, mi 130 (68.42%) chu Aizawl district-a mite an ni. District danga thi zat chu Lungleiah mi 16, Siahaah panga, Kolasib-ah pali, Serchhipah 18, Lawngtlaiah paruk, Champhai, Mamit leh Saitualah pathum ṭheuh leh Hnahthialah pahnih an ni a; Khawzawl district-ah thi an awm lo thung.