Vairengte-Aizawl kawng dang dawn lo

Land Owners' Association (Vairengte-Kawnpui Package 3-6 NH 06 & 306) hruaitute chuan kawngpui zauhna atana an ram lakah zángnadawmna pe thuai tura sorkar karna atana vawiin aṭanga Mizoram luhka pawimawh, Vairengte leh Aizawl inkar kawngpui dan (road block) an tum chu an ṭhulh thu Vanglaini an hrilh.

Hetihlai hian, ram neitu ṭhenkhat chu nimin khan Vairengteah hnatlangin vawiina kawng dan an tuma tih tur pawimawhte an ti. Anni ho hi chuan he thuziah lai thleng hian kawng dan hi an la duh a ni.

Kolasib bawrhsap John LT Sanga chuan nimin khan Land Owners' Association hruaitute a kâwm a; zangnadawmna sem chhuah thuai a nih theih nan theihtawp an chhuah thu sawiin, hmalak dante a hrilhfiah a, ni hnih/thum tal sorkar hmalakna ngaichâng leh rih turin a ngen.

Land Owners' Association hruaitute'n an sawiho hnuah Kolasib DC ngenna chu zahawm an tih avangin kawngpui dan an tum chu ṭhulh an remti a ni. October 2022 chhung sorkar hmalakna ngaihchàn an rél a, an duh anga hmalakna a awm lo a nih chuan zangnadawmna pek phûtna atana na zawka hmalak ngei an rél bawk.

Tarlan tawh angin, Land Owners' Association hi Ministry of Road Transport & Highways hmalaknaa NHDCIL-in Vairengte-Sairang inkar kawng zauh tura ram laksakte an ni a; zangnadawmna an dawn tur sum chu NHDCIL-in chuan zangnadawmna buaipuitu CALA (Kolasib Additional DC) account-ah July 8, 2022 khan an thun tawh a ni.