A ngheta thawk zirtirtu dah phûtin Lungsenah total bandh huaihawt a ni

Lungsen NGO Coor­dination Committee chuan an Lungsen High School-ah mathematics leh science zirtirtu, a ngheta thawk (regular) dah phûtin nimin khan an khuaah total bandh an huaihawt a, nimin tlai dar 5 khan an titawp.

Lungsen aṭanga thu dawn danin, NGO-te chuan Lungsen H/S-ah mathematics leh science zirtirtu a ngheta thawk dah turin Mizoram sorkar an lo ngen tawh ṭhin a; mahse, an ngennain awmzia a neih loh avangin nimin zing dar 5 aṭang khan total bandh an kalpui a ni.

Hetih lai hian, School Education department hotute chuan, Lungsen H/S-ah hian zirtirtu indaih tâwk tur dah a nih thu Vanglaini an hrilh.

Total bandh hi Oct. 26, 2022 thleng kalpui tura ruahman ni mah se, mipuiin an zawm ṭhat avang leh School Educa­tion Director hnen aṭangin Lunglei H/S-a zirtirtu a nghet dah tur tihfel a ni tawh thu an dawn avangin nimin tlai dar 5 khan total bandh an tihtawp a ni.

School Education department hotute sawi danin, Lungsen H/S-a zirlai dinhmun ngaihtuahin zirtirtu indaih tâwk tura dah a ni a; chutih laiin, Lungsen NGO-te chuan regular teacher dah an phût thung.
Lungsen H/S-ah regular teacher dah turin sorkarin kawng a dap mek a, chuti chung chuan sorkar nen indàwrna awm lêm loin Lungsen NGO-in total bandh an huaihawt niin Education department hotute chuan an sawi.

School Education department hotute chuan, zirtirtu sawn kual (transfer) chu a rualin thla thum danah khawih a ni ṭhin nia sawiin, chumi ang chuan tunlai hian zirtirtu transfer an khawih mek niin an sawi a; Lungsen H/S-ah pawh zirtirtu nghet dah theih dan a awm leh awm loh an zawng a, zirtirtu dah tur an ruahman fel tawh niin an sawi bawk.