Dan loa KVK ram chhuh tumnaah Kolasib MJA-in hma an la

Mizoram Journalists' Asso­ciation (MJA), Kolasib district hruaitute chuan nimin khan Kolasib bawrhsap John LT Sanga a pisaah an hmu a, Krishi Vigyan Kendra (KVK), Kolasib ram, dan loa chhuh luih tumna awm mek chu a ṭhat loh thu an thlen. Bawrhsap chuan hma a lâk nghal tur thu a lo hrilh.

Kolasib MJA hruaitute chuan, Kolasib KVK ram mawng lam chu tun hnaiah Kolasib Vengthar V/C-in observation home atan tiin phalna la hmasa loin an lai tih thu an dawn thu an sawi a, "Sorkar ram sât hêk a, ram neitu KVK phalna la hmasa loa hmalakna a awm a ṭha lo tak zetin kan hria," an ti.

KVK din turin ram hectare 25 vela zau mamawh a nih thu sawiin MJA-te chuan, "KVK ram sât hêk zawnga hmalakna a awm zel chuan central inspection team-in an rawn en hunah farmer-te tana office ṭangkai tak KVK hi awlsam taka chàn mai thei kan ni," a ti a; Kolasib KVK chu India ramah pawh a ding hmasa ber zinga mi a nih avangin mipuiin an hlut deuh deuh a pawimawh thu an tarlang.

Kolasib MJA tarlan danin, Kolasib DC John LT Sanga chuan sorkar phalna tel loin sorkar ram sah hêk phal a ni lo tih sawiin, observation home atan KVK nodal department, Agriculture Secretary hnenah an phal em tih a zawhna chu chhàn a la ni lo tih a sawi a ni.

Bawrhsap sawi danin, observation home tur chu Saidana Sericulture ram dil a ni a, Sericulture Secretary hnenah DC-in thlen tawh mah se, an remti lo. Khuangpuilama Soil & Water Conservation department ram pawh department Secretary hnenah dilna a thlen tawh a, hun remchangah enho turin an rawn a ni.

KVK ram mawng lam chu Kolasib Vengthar VC-in JCB hmangin an lài ṭan tawh a, kut an lo thlak ngawt chu thil tih chi a nih loh thu DC chuan sawiin, lehkha hmangin Vengthar VC chu hriattir an ngaih thu leh a hmunah tlawh a, thil awm dan enfiah turin Kolasib SDO (Sadar) Vanlalchhuanawma Chawngthu a ruat nghal thu MJA hruaitute a lo hrilh bawk.