MNF chu a hunah Pathianin Min hruai chhuak zel a ni - Dr R Lalthangliana

MNF adviser Dr R Lalthangliana, minister chuan, MNF chu Pathianin a hunah a hruai chhuak zel ṭhin niin a sawi.

Aizawl South-I Mizo National Womens Front-in nimina Sakawrtuichhuna political training an buatsaih a hmanpuinaah thu sawiin R Lalthangliana chuan, MNF chu Mizo nihna dik tak, Mizo nationalism pho chhuak tura kal a nih thu a sawi a, "He pawla awm kan nih chuan 'Pathian leh kan ram tan' tih hi a pawimawh. Pathian kan dah hmasa ber a, a dawtah ram kan dah pawimawh leh a ni. A cháng chuan hun khirh takah kan ding ṭhin a, a hunah Pathianin min hruai chhuak zel a ni," a ti.

Dr R Lalthangliana chuan, Laldenga a awm loh hnuah kum 1990 aṭangin Pathian ṭih mi leh hruaitu fel, leadership nei ṭha Zoramthanga an neih thu sawiin, "A kaihhruaina hnuaiah lungrual takin kan kal zel a, Pathianin sorkarna min pe leh a ni," a ti a; kum 2023-a inthlanpuiah pawh Pathian leh mipui zarah MNF an sorkar leh ngei tur thu a sawi a ni.