Lalsawta'n Aizawl East-II a bial laiin Hna a thawk ṭha hle - MPCC Media

MPCC Media department chuan nimin khan an president Lalsawta'n Aizawl East-II bial a enkawl laia a hnathawh hrang hrangte an tlawh a; Aizawl East-II chhung veng hrang hrang tana ro tling (asset) zawng zawng deuh thaw chu Lalsawta hnathawh a nihzia a takin an hmu niin an tarlang.

MPCC Media chuan, Lalsawta'n East-II a enkawl chhungin MLA fund bakah, veng hrang hrang hall leh auditorium, inkalpawhna kawng leh leite bakah, mipuiin an hman ṭangkai Aizawl Bazarpuite pawh sak ṭhat a nih theih nan hmalakna thui tak a nei tih an tarlang a, "Bazarpui hi NEDP sum aṭangin cheng nuai 3,641.59 ruahmanin bul ṭan a ni a, kum li a ral hnuah pawh MNF sorkar hnuaiah a hlawhtlinna hmél hmuh tur a la awm lo," an ti.

Aizawl East-II bialtu MLA ni mek Robert Romawia Royte-in hnathawh a tum, lungphùm a phùm tawh ṭhenkhat an en thu tarlangin MPCC Media chuan, "MLA inthlan dawna a intiamnate a tihlawhtling ṭha lo hle a, bial chhung inkalpawhna ṭhenkhat phei chu MLA a nih hnua khawih danglam la ni miah lo ang maiin zawh tlak lohte pawh a awm," an ti a; Robert Romawia chu lungphùm ringawt lo a, hna thawk turin an phût.

MPCC Media chuan, Lalsawta'n Aizawl East-II chhunga hna ṭha tak tak a thawh bakah, Mizoram sum dinhmun a ṭhat theih nan sum leh pai insawhngheh kum (year of consolidation) te, inrenchemna (austerity measure) nasa taka a kal pui avangtein mi tam takin Finance Minister ṭha ber a ni, an ti hial niin an sawi bawk.