Thu dik famkim lo hmanga mipui bum tumna sim turin MNYF-in ZPM an chah

MNF ṭhalaite chuan thuchhuah siamin, thu dik famkim lo hmanga mipui bum tumna sim turin ZPM party an chah.

MNYF chuan, October 22, 2022-a Dampa East Block Political Training-ah, 'Aizawl by-pass road atan cheng vbc. 500 leh bamboo link road atan budget-ah vbc. 100 an dah theih chuan keini pawhin budget-ah vbc. 1,000 kan dah thei,' tia an sawi chu Zoramthanga kaihhruai MNF sorkar an sawi chhan tih hriat theih a nih thu an tarlang a, "Nuihzathlak kan ti a, Mizoram mipui bum tumna leh budget kalphung hre lo zawk mipuite thu dik chanve hmanga bual ât an tumnaah kan ngai," an ti.

February 1, 2022-a Union Finance Minister-in kum 2022-23 budget a pharhah hmarchhak state pariat tan Prime Minister’s Development Initiative for Northeast (PM-DevINE)-ah cheng vbc. 1,500 dah a nih thu sawiin MNYF chuan, "Heng zinga vbc. 600 chu Mizoram tana ruahman a ni," an ti a; Mizoram tana sum ruahman chu hmarchhak state dangte thîk tham khawp niin an tarlang.

MNF ṭhalaite chuan, "Aizawl khawpui traffic jam tihziaawmna tur project, Aizawl by-pass road cheng vbc. 500 zet senna tur leh loneitute'n an huan leh lo awlsam zawka an pan a, thlai thar awlsam zawka an phurh chhuah theihna tur bamboo link road siamna atan vbc. 100 zet PM-DevINE hnuaiah dah a ni. Mizoram budget aṭanga cheng khat mah sen belh ngai lo 100% central funding turin pawm a ni," an ti.

Aizawl by-pass road leh bamboo link road siamna tur sum chu Mizoram budget aṭanga dah hran emaw tih theih tura ZPM-in an aupui reng chu pawi an ti tak zet thu an tarlang bawk.