Israel mithiamin Centre of Excellence a tlawh

Israel Embassy-a agriculture attache Yair Eshel chuan October 22, Inrinni khan Israel leh India sorkar thawh dunnaa Haulawng rama Indo-Israel Centre of Excellence for Fruits a tlawh a; Centre of Excellence-ah hmasawnna hmuh theiha a awm chu lawmawm a tih thu a sawi.

Israel mithiam, Yair Eshel hi Centre of Excellence-a project officer Hunlawmawma leh a thawhpuite'n an lo dawngsawng a; Yair Eshel chuan, Centre of Excellence chuan hmuh theihin hma a sawn tih sawiin, "Tui hnianghnar taka hman lei chhunga tui ṭha an nei ta hi a lawmawm a, mipui tan ṭangkai zawka hman a nih theih nan technology thar nen thuam ṭhat zel a ni ang," a ti.

Centre of Excellence-a serthlum chìnte duhthusam tâwk lohnate sutkian a nih theih nan Israel sorkarin theihtawp a chhuah zel dawn thu sawiin Yair Eshel chuan, a hmun ngeiah Israel scientist-te nen Febuary 2023-ah training an buatsaih dawn thu a sawi.

Yair Eshel hian October 23, Pathianni pawh khan Centre of Excellence-a thawkte chu canopy management leh serthlum enkawl dan a zirtir a ni.

Centre of Excellence for Fruits hi India leh Israel thawh dunna hnuaiah cheng nuai 900 sênga din a ni a, March 7, 2018 khan hawn a ni. Kum 2011 aṭanga 2022 chhungin phun turin serthlum 5,000, dragon fruit 80,000 leh thingfanghma 2,000 an pe chhuak tawh.

Tunlai hian tamoto, broocoli leh sweet pepper chîte pek chhuah mek a ni a; nursery-ah dragon fruit 40,000 leh serthlum seedling 25,000 pek chhuah mai theih an la nei bawk.