Covid-19 vei an tlem tial tial

October 23, Pathianni khan Mizoramah swab sample 26 endikah Covid-19 vei mi pakhat chiah hmuh chhuah a ni a, positivity rate pawh 3.85% chiah a ni. Hripui vei enkawl lai an tlem tial tial a, nimin tlai khan Covid-19 positive mi 32 chiah an awm.

IDSP aṭanga thu dawn danin, Pathiannia hripui vei hmuh thar mi pakhat chu Lunglei district-a mi a ni. Nimin khan hripui vei dam tawh mi 21 chhuahtir an ni a, hripui vanga thi an awm lo.

Mizoramah swab sample 19,87,118 endik tawh niin, Covid-19 vei 2,38,747 hmuh chhuah a ni tawh a, 12.01% a ni. Nimin tlai dar 3 thlengin mi 2,37,992 (99.68%) chhuahtir an ni tawh a, mi 723 (0.30%) thi tawhin, enkawl mek mi 32 (0.02%) an awm.

Mizorama district 11 zinga district panga - Siaha, Champhai, Kolasib, Lawngtlai leh Hnahthial district-ahte Covid-19 vei an awm tawh rih lo a; positive mek mi 10 aia tam awmna Aizawl district chiah a awm a ni.