KHAWTHLIR

Thisen pe
KṬP, Hnahlan Branch chuan nimin khan Synod Hospital Blood Bank-ah thisen unit 17 an pe a, petute mipa 14 leh hmeichhia pathum an ni. Mimala thisen pe, individual voluntary donor mi pahnih an awm bawk.

Hma hun inzirtirna
YMA, Sakawrhmuituai Group chuan nimin khan Lungdaiah an group huam chhunga pawl 8-12 zirlaite tan hma lam hun inzirtirna, career guidance programme an buatsaih a, mithiamte'n zirlaite fuihna thu an sawi. Zirlai ti ṭhate leh article inziahsiaka ti ṭhate hnenah lawmman sem a ni bawk.

Anganwadi hawng
Tuikual South Anganwadi Center No. 1 chu nimin khan bialtu MLA Lalruatkima, minister of state-in a hawng. Lalruatkima chuan nau pai, nau piang hlim leh naupang enkawltute'n anganwadi an ngaih pawimawh zel a ṭul thu a sawi. In hawn tâk hi kum 2005-ah sak ṭan a ni a, Lalruatkima'n MLA fund aṭanga a pek Rs 3,50,000 hmangin sak zawh a ni.

Hmalaknaah lawm
Provisional Employee Association of Mizoram, PHED Branch chuan, Public Health Engineering department-a provisional employee-te'n hlawh an lak kim lohna (arrear) pek an phût chungchangah, PHE Minister-in hma a laksak avanga arrear an hmu thei tur chu lawmawm an tih thu an tarlang. "Kan Arrear hi beitham hle mahse keini tan chuan a hlu tak zet a, kan sorkar leh department hotute chungah lawmthu kan sawi a ni," an ti.

UNO Day hmang
ZORO General Headquarters, Aizawl chuan nimin khan MZP pisa conference hall-ah United Nations Organization (UNO) Day an hmang a, ZORO president R Sangkawia'n thu a sawi bakah, political party hrang hrang aiawhte'n thu an sawi a ni. R Sangkawia chuan UNO chu October 24, 1945-ah khawvel ram hlawm lianten an din a ni a nih thu leh permanent member 5 awmin, ram hrang hrang 193 an inthlunzawm mek thu a sawi.