CM-in Champhai Winery a tlawh ; Wine rate tur ngaihtuah mek a ni - CM

Chief minister Zoramthanga chuan nimin zing khan Tlangsama Champhai Grape Growers Society (CGGS)-in grape an sàwrna hmun, Champhai Winery tlawhin, a dinhmun a enfiah a; grape wine man (rate) tur ngaihtuah mek a nih thu a sawi.

Champhai Winery general manager Hrilchunglura tarlan danin, Champhai Winery chu kum 13 a ni tawh a, grape an sàwr ṭhin chu Bangalore Blue variety a ni. Kum 2010-ah grape quintal 918 leiin bul an ṭan a, nimin thleng khan grape quintal 15,218 an lei tawh a, grape lei nan Rs 5,78,41,160 an séng tawh. Kumin bikah quintal 1,144.98 an lei tawh a, a vaiin a umna zémah an dah tawh a ni.

CGGS chairman HS Vanlalfak­zuala kaihhruaia CGGS member-te nen Champhai Winery pac­king hall-a an inkawmnaah CM Zoramthanga chuan Grape Wine Rules chungchang a sawi a, "Mizoramin grape kan tharte aṭanga siam chhuah grape wine hi dan ang thlapin kalpui a ni a. Political party hrang hrang remtih­naa hming sign thlapin Grape Wine Rules a lo piang ta a, wine rate tur ngaihtuah mek a ni," a ti.

Zoramthanga chuan, grape chíngtute hmá ngaiin an sorkar hmasak aṭangin hma an lak tawh ṭhin thu sawiin, "Harsatna siam záwng leh a tibuai záwnga kalpui kan duh lo a, an sum pûk cheng nuai 83 chuang pawh rulh ngai loin kan lo inngaidam tawh a ni," a ti a; grape leh sapthei chu a hringtute zingah tel vea a inhriat thu leh a tuina a nih thu a sawi.

Grape wine hralhna (market) chungchang sawiin CM Zorama chuan, " Project mumal tak siamin hma kan la ang a, a bul ṭantu ka nih angin a theih ang angin Delhi thlengin hma la turin kan kal zel ang. A sâwngbàwlnaah leh market intervention chungchangahte hma la turin Planning department pawhin an buaipui thei ang," a ti.

Chief Minister chuan, Champhai chu boruakin a zir avangin grape bakah, thei leh thlai chi hrang hrang ṭha taka thar theih a nih thu te, Mizoram hmun dangte pawh buh, thei, thlai leh pangpar chi hrang hrang thar theihna tur hmun, ruahtui leh sik leh sá ṭha tak nei a nih thute a sawi bawk.

CGGS hruaitute chuan, The Mizoram (Liquor Prohibition) Rules, 2022 hnuaia grape wine dan thar, The Mizoram Grape Wine Rules, 2022 siam a nih tâk avanga an lawm thu an sawi a; hripui lèn lai leh Wine Rules awm hmaa harsatna an tawhte Chief Minister an lo hrilh a ni. Lakhuihthei, theitê, dragon fruit leh thei dangte pawh sâwngbàwl a nih theih nan dante zau zawka mipui chhawr theih tura buatsaih turin an ngen bawk.

Champhai Winery General Manager tarlan danin, CGGS hian sorkar laipuia Ministry of Food Processing Industries kaltlangin project an kalpui mek a; Pradhan Mantri Jan Vikas Karyakram hnuaiah Commerce & Industries department kaltlangin project an dil mek bakah, Ministry of Agriculture and Farmers Welfare hnuaiah MIS an dil mek bawk.

An thil siamte Mizoram páwna hralh chhuak thei turin hmachhawp an nei a; dan thar hnuaiah winery license tinung leh turin hma an la mek a, grape wine man (rate) mumal siam a, a zuartu tur (vendor) thlan a nih hnuah dan hnuaiah grape wine zawrh chhuah an tum a ni.
Winery tlawhnaah hian Chief Minister hi MLA Dr ZR Thiamsanga, Champhai DC leh SP ten an ṭawiawm a ni.