Kawng chhia siam tura hmalakna YMA-in Oct. 31 thleng ngaichâng dawn

YMA Sub-Head­quarters, Lunglei chuan, Aizawl - Thenzawl - Lunglei (ATL) kawng chhia siam tura hmalak dan October 31, 2022 thleng an ngaichang dawn a; an duhthusama hmalakna a awm loh chuan an thiam ang anga hmalak an tum.

Lunglei Sub-Headquarters YMA chuan nimin khan thuchhuah siamin, Mizoram chhim lam mipui tana kawngpui pawimawh ATL Road-a Ramlaitui leh Lunglei inkar chu contractor Bhavya Construction-in an siam aṭanga fûr khat pawh a ral hmain nasa takin a chhe leh nghal tih an tarlang.

Lunglei YMA tarlan danin, kawngpui siam a nih theihna atan Chief Minister leh chhim lam MLA-te an dàwr tawh a; a hnuah kawngpui tlo zawk a awm theih nana hma laksak tura ngenna lehkha Chief Minister an pe leh bawk.

An hmalakna chu a sâwt loh avang leh kawngpui a chhiat belh zel avangin, mawhphurtute koh eih a nih theih nan October 18, 2022 khan No Vehicle Day an lo puang tawh a ni.

No Vehicle Day-in awmzia a nei lo leh a, an beisei angin YMA chuan mawhphurtute aṭangin thu an dawn loh bakah, kawng siamnaah pawh bul ṭanna hmel rintlak hmuh tur a awm loah an ngai a ni.

Lunglei Sub-Hqrs YMA chuan, mawhphurtute ngawi reng leh hmalakna beitham leh ningnél lutuk an dem tak zet thu tarlangin, "Hei hi chhim lam mipui zahlohna leh hmuhsitna lian takah kan ngai," an ti.

October 31, 2022 thleng kawng siama hmalak dan ngaichàn an rél tih tarlangin Lunglei YMA chuan, "October 31 hian hmalakna awm leh awm loh leh, hmalakna rintlak a ni em tih a hmunah kawng chhe lai en ni se. Duhthusama hmalak a nih loh a, mawhphurtute hnen aṭanga thu hla hriat a nih loh bawk chuan, kawngpui ṭha kan neih theih nan kan thiam anga hmalak ni se kan ti ta a ni," an ti.