Primary zirtirtute'n ṭanpuina sem ; Sorkar sikulah zirlai an pung - Education Minister

Mizoram Primary Teachers' Association (MPTA) chuan nimin khan Synod Conference Centre-ah Endowment Fund aṭangin ṭanpuina sem inkhawm an buatsaih a; khuallian, School Education minister Lalchhandama Ralte chuan, sorkar sikulah zirlai an pung niin a sawi.

Lalchhandama Ralte chuan, MPTA-in zirlai harsate ṭanpuina tur Endowment Fund an sem chu lawmawm a tih thu sawiin, "Zirtirtute kawng hrang hrangin an luang liam ṭhin a, a lawmawm tak zet. A pe chhuak tam apiang an hlim ṭhin," a ti a; ṭanpuina sem chu chhunzawm zel a, mi dangte tihhmuhtuah ṭang turin a chah.

Mizoram sorkarin zirna a ngaih pawimawh thu sawiin Minister chuan, "Covid hripui léng harsa karah a theih ang angin thawh zel a ni a, mipui pawhin sorkar sikulah rinna an nghat chho zel. Sikul khâr leh sikul kaih kawp tur ri tam tak kha tunah chuan a ri ta meuh lo. Sikula hming ziak an pung a, classroom indaih loh thu te, ṭhutthleng leh dawhkan indaih loh thute hriat tur a tam ta," a ti.

Endowment Fund aṭanga ṭanpuina sem inkhawm hi MPTA vice president Rosangzuala'n a kaihruai a, president R Zonunmawia'n fuihna thu a sawi. MPTA hian an sub-headquarters tin aṭanga zirlai pakhat zel thlan mi 19 hnenah Rs 5,000 ṭheuh an pe a, Aizawl an panna senso an tumsak bawk.