ZPM-in a hlangin kalphung thar sorkar siam kan tum - ZPM Working President

ZPM working presi­dent K Sapdanga chuan, kum 2023-a Mizoram inthlan­puiah ZPM-in a hlangin kalphung thar sorkar siam an tum tih sawiin, ZPM sorkarah Lai hnam aiawh tel ngei se an duh thu a sawi.

K Sapdanga hian nimin khan Lawngtlai Areopagy-ah thu sawiin, Lai district-a ZPM meichher chhitute an chhuan thu leh an zárah Mizoram chhim lamah ZPM-in hma a sawn zel an beisei thu a sawi a, "Kum 2023 MLA thlanah ZPM-in a hlangin kalphung thar sorkar siam kan tum a, Lai fa an tel ngei tur a ni. MLA pangngai lo deuh turte pawh kan lo beisei dawn a ni," a ti.

ZPM Working Presi­dent chuan, ZPM chief minister candidate atan Val Upa Council-in Lal­duhoma an ruat thu sawiin, "ZPM hian zaa zain kan pawm. Kum 2023 inthlan awm turah eng party nen mah thawhho kan la rêl lo a, absolute majority sorkar nei turin kan inbuatsaih mek zawk a ni," a ti a; ZPM hruai sorkar siam turin Chhimtuipui district (ṭhen hma) aṭangin MLA pali an nei thei tura an ngaih thu a sawi a ni.

Mizoram chhim lama hmasawnna tur project pawimawh tak takte hlamchhiah a ni chu mak an tih thu sawiin Sapdanga chuan, "ZPM hun a thleng a nih chuan Mizoram hian 'Look South Policy' a kalpui lo thei lo," a ti a; buh hnianghnâra neih nan Chamdur project, kawlphetha atan Kolodyne hydel project leh Asia chhimchhak ramte nena insumdawn tawnna atan KMMTTP-te an hawisan theih loh thu a sawi.

ZPM Working President chuan, mipuiin ZPM sorkar hun an nghakhlel nia sawiin, "A nghakhlel ber tur pawh Lai district mipui kan niin kan hria a, hmasawnna hna thawk tur chuan MLA pahnih kan thawh dawn ni pawhin kan hria. Neutral leh sorkar hnathawkte'n inthlan an nghakhlel hle, party-ah an tui thar thut tihna a ni lo, sorkar kalphung an en a, an tan hei aia mangan ngaihna a awm tawh lo," a ti.

Autonomous district council-te chu state hmasawn nan an pawimawh tih sawiin K Sapdanga chuan, "Kan sorkar hian sum siam nan a hmang mai mai a, council-in an hmuh tur ang an hmu thei tawh lo a, an hmuh chhun pawh an duh angin an hmang thei lo," a ti a; ZPM chuan kil tin aṭangin hmasawnna thawh an duh a, ramri aṭanga thawh ṭan an tum thu a sawi.

MLA Lalchhuanthanga pawhin thu sawiin, Mizoram state a nih hnua kum 35 chhung Congress leh MNF party-te'n ram an enkawl dan chu a lungawithlak loh thu sawiin, "Hruaitu ṭha nei ila, hetiang reng tur hi kan ni lo. Party pahnihteah hian mipui an beidawng tawh a ni," a ti.
Areopagy-a vantlang inkhawmah hian LADC MDC hlui pahnih H Thangchemsanga leh PT Lalchuanglura bakah, mi dangte ZPM-ah lawm luh an nih thu ZPM thuchhuah chuan a tarlang.