Bawngkawn-Chanmari via Ramhlun AMC-in Laldenga Road tia thlâk a rêl

Aizawl Municipal Corporation (AMC) Board of Councillors (BoC) chu nimin khan AMC Meeting Room-ah an ṭhukhawm a; Bawngkawn - Chanmari via Ramhlun kawng hming, Jawaharlal Nehru Road tih chu Laldenga Road tia thlâk an rél.

Aizawl mayor Lalrinenga Sailo hnen aṭanga thu dawn danin, AMC BoC ṭhutkhawmah hian AMC huam chin zauh chungchang sawiho niin, zauh tura hmalak an remti a, bawhzui zel turin an dah. Councillor tih chu corporator tia thlâk an rél bawk.

Bawngkawn - Chanmari via Ramhlun kawng hming thlâk chungchang sawiho a nih laiin eptu councillor-te chuan tute emaw party sorkar lai leh sorkar loh lai a nih avanga hming thlâk a ni ṭhin chu an duh loh thu an sawi a; hei vang hian rorelna hmun an chhuahsan a, eptu councillor-te tel loin rorel lai councillor-te'n hming thlâk an rél thlu a ni.

Mayor Lalrinenga Sailo chuan, AMC sorkar hmasa berin Aizawla kawngpui hrang hrang hming a phuahah Bawngkawn - Chanmari via Ramhlun kawng chu Jawaharlal Nehru Road tia vuah a nih thu sawiin, "Hemi hma hian Laldenga Road tia hriat a ni ṭhin a, Nehru Road tih a nih hian bawhzui a ni lo a, gazette-ah pawh chhuah a ni lo a, chuvang chuan Laldenga Road tia thlak kan rêl a, gazatte-ah pawh chhuah a ni ang," a ti.