CM-in Keilungliah tuikhuah a tlawh

Chief minister Zoramthanga chuan nimin zing khan Champhai síra Keilungliah tuikhuah a tlawh a, tuikhuah hna thawktute nen inkâwmin, hmalaknate an sawiho. Chief Minister hi Champhai North bialtu MLA Dr ZR Thiamsanga leh sorkar official-te'n an ṭawiawm a ni.

Sorkar thuchhuah tarlan danin, Keilungliah tuikhuah hi a project hming chu 'Dam Reservoir and Development of Recreation Centre at Keilungliah' tih a ni a, contractor chu SS Construction a ni. Tui khuahna atan DoNER kaltlangin Non Lapsable Central Pool of Resources (NLCPR) aṭangin cheng nuai 1,988 hmuh a ni a, project-in tuikhuah bakah, a panna kawng siamna a keng.

Tuikhuah siamnaa hna thawh tur zinga 98% vel an thawk zo tawha chhût a ni a; tuikhuah san zawng metre 20, a bulṭhut chhah zawng metre 14, a chhip lama a chhah zawng metre 4 niin, a sir tawn tawnah kea kalna metre 1.50-a zaua siam a ni. A bulṭhut khuahna thui zawng metre 54.61 leh a chung lamah a thui zawng metre 102.60 a ni bawk.

Keilungliah tuikhuah chîm chin zau zawng chu square metre 84,130.19 a ni a, lui hnár lam metre 930-a thui chîm tura ngaih niin, tui litre 40,22,51,500 tling thei tura ngaih a ni.

CM Zoramthanga hian nimin vêk khan a hoa din Champhai Vengthlang Middle School kum 60-na, diamond jubilee lawmna hun a hmanpui bawk a; hlawhtling tura pawimawh ber chu tumruhna a nih thu a sawi. Vengthlang MS hi January 16,1962-ah hawn a ni.