Rs 25,000 dawngtute aṭangin MNF fund tur sum an pawt hêk? - ZPM Ṭhalai

ZPM Ṭhalai chuan, MNF flagship programme, SEDP hnuaiah mipui sum, Mizoram state budget aṭanga ṭanpuina Rs 25,000 sem dawngtute aṭangin khaw ṭhenkhatah MNF unit-te'n party fund tur pawisa an pawt hêk nia sawi a awm thu an tarlang a, "He thil hi kan ngai thutak hle," an ti.

ZPM ṭhalaite chuan, "SEDP sum sem hi Mizoram mipui enkawlna tura sorkar sum, mipui ta a nih avangin pawisa cut emaw, party fund atana khawn lêt emaw a awm a nih chuan ZPM Ṭhalai-ah inhriattir turin kan ngen a ni," an ti a; Mizoram state-in sum harsatna nasa tak a tawh laia party inhâivûrna atana mipui sum hmang an awm a nih chuan SEDP district board lakah hma an lak dawn thu an tarlang a ni.