Khaw intodelhte lawmman sorkarin A siam theih nan SSU-in hmalak rêl

Students' Self Support Union (SSU) General Headquarters chuan October 24-25, 2022 khan Hnahthial Electric Veng GSA Hall-ah General Assembly vawi 35-na an hmang a; intodelh kawngah ram leh hnamin hma a sawn theihna tura khaw intodelh lawmman sorkarin a siam theih nan hmalak an rél.

Thawhṭanni zana rorel inkhawmah, 'Intodelh kawnga ram leh hnamin hma a sawn theih nan khaw intodelhte hnenah sorkarin lawmman a siam theih nan SSU-in hma la rawh se,' an ti a; zirna ṭha leh belhfâkawm neih a nih theih nan sorkarah rawtna thlen an rél a ni.

SSU din champha pualin kum tin thisen pek ṭhin an rél a; SSU-in zirlai mahni intodelhte hnena kum tin a hlan ṭhin Self-Support Award-in a ken tel pawisa chu Rs 10,000 aṭangin

Rs 20,000-ah tihpun an rél bawk.

Nimina SSU inkhawmpui chu SSU vice president Johan Lalremruata'n a kaihruai a; South Tuipui bialtu MLA Dr R Lalthangliana, Higher & Technical Education minister khuallian niin, Mizoram Cooperative Apex Bank chairman T Lalmuanpuii khualzahawm a ni.

Dr R Lalthangliana chuan, SSU thupui 'Kut hnathawh chawisan' tih leh 'Zirna atana mahni intodelh' tih chu ropui a tih thu leh amah pawhin tawnhriat a neih thu sawiin, "Pathian hian malsawmna min pek dawn chuan retheih leh thawhrim hmasak a ngai a ni," a ti.

'Kut dâwngdah chuan retheihna a thlen a, taimâkna kut chuan hausakna a thlen ṭhin' (Thufingte 10:4) tih a nih thu sawiin R Lalthangliana chuan, "Tumruhna, dikna, rinawmna leh taimâkna hi a pawimawh ber a, theih loh hi khawvelah a awm lo," a ti a; Mizo nationalism vawng nung reng turin kal khawmte a chah.

Inkhawmah hian khualzahawm T Lalmuanpuii, SSU president Lalawmpuia leh Hnahthial Electric Veng VC vice president C Lalbuatsaiha ten thu an sawi bawk.

SSU General Assembly-ah hian chawhnuah 'Intodelh Campaign & Career Awarness' an hmang a; zanah Vangpui Kût an hmang leh a, Hnahthial bawrhsap R Lalremsanga chu kût pa niin, Holy Heart School principal Lalbiakzami chu kût nu a ni.