Zoram Harh Rawh Campaign intihsiak kalpui dan tur sawiho

Mamit District Organising Committee on Zoram Harh Rawh Campaign chu nimin khan DC conference hall-ah bawrhsap Lalnunhlua hoin an ṭhukhawm a; Mizo hnam làm, zai, hlado leh hla inphuahsiak hmanga YMA branch-te inelna buatsaih dan tur an rél.

Ṭhutkhawmah hian, November 17-18, 2022 chhungin Mizo hnam làm, zai, hlado leh hla phuah hmanga intihsiakna Mamit Chhimveng YMA Hall-ah buatsaih an rél a; inelnaa tel turte tan October 31, 2022 thleng inhriattir hun hawn turin an rêl a ni. Mamit district-a YMA branch tin chu inelnaa tel turin an sáwm.

Intihsiaka ti ṭhate hnenah lawmman pek tur a nih bakah, tel zawng zawng hnenah lawmman pek tur a ni a; a ti ṭhate chu Mizoram pum huap intihsiakna, December 1, 2022-a Aizawla neih turah an tel dawn a ni.