Hripui vei enkawl lai 41 an awm

October 24, Thawhṭanni khan Mizoramah swab sample 122 endikah Covid-19 vei mi 16 hmuh chhuah a ni. Nimin khan hripui vei dam tawh mi pasarih chhuahtir an ni a, Covid-19 positive mi 41 an awm mek.

IDSP aṭanga thu dawn danin, Thawhṭannia hripui vei hmuh chhuahte chu Saitual district-a mi 11, Aizawl district-a mi pathum leh Lunglei district-a mi pahnih an ni a; positivity rate 13.11% a tling.

Mizoramah swab sample 19,87,240 endik tawh niin, Covid-19 vei 2,38,763 hmuh chhuah a ni tawh a, 12.01% a ni. Nimin tlai dar 3 thlengin mi 2,37,999 (99.68%) chhuahtir an ni tawh a, mi 723 (0.30%) thi tawhin, enkawl mek mi 41 (0.02%) an awm.

Mizorama district 11 zinga district paruk - Siaha, Champhai, Kolasib, Serchhip, Lawngtlai leh Hnahthial district-ahte Covid-19 vei an awm tawh rih lo a; positive mek mi 10 aia tam awmna Aizawl leh Saitual district a awm a ni.