KHAWTHLIR

CM-in hmanpui
Nimin khan chief minister Zoramthanga chuan a hoa din Govt Vengthlang Middle School, Champhai kum 60 (Diamond Jubilee) tlin lawmna hun a hman pui. Zoramthanga chuan hlawhtling tura pawimawh ber chu tumruhna a nih thu a sawi. Govt Vengthlang MS hi January 16,1962 khan hawn ṭan a ni.

MCC-in thisen pe
Mizoram Christian College NSS chuan nimin khan an college-ah Civil Hospital, Aizawl tan thisen unit 80 an pe a, petute mipa 71 leh hmeichhia pakua an ni.

PMFME inzirtir
Sorkar laipuia Ministry of Food Processing Industries leh Mizoram sorkara Commerce & Industries department chuan nimin khan Mamita Siamliana Hall-ah Pradhan Mantri Formulisation of Micro Food Processing Enterprises Scheme chungchang inzirtirna an buatsaih a; self help group member te, eisiam lama tui mite leh thuthar thehdarhtute an tel.

Pipe phum tur sawiho
Coordination Committee on Management of Aizawl City chu nimin khan an chairman Dr Lalhriatzuali Ralte, bawrhsap kaihhruaiin a pisaah an ṭhukhawm. Vaivakawn traffic point leh Hunthar Veng pénga lei tlahniama SIPMIU hna thawh kal meka tui pipe phûm dan tur leh harsatna thleng thei laka invên dan tur sawiho a ni.

Hliappui kum 50-na
Saitual district-a Hliappui khua chuan nimin khan an khaw community hall-ah an khaw kum 50-na, golden jubilee an lawm a, bialtu MLA L Thangmawia'n a hmanpui.

SVEEP inzirtir rêl
Lunglei District SVEEP Core Committee chu an chairman Kulathungan A, bawrhsap hoin nimin khan an ṭhukhawm a, inthlan kaihhnawih thil pawimawhte inzirtirna Systematic Voters’ Education and Electoral Participation kalpui dan tur an sawiho. Two wheeler rally, campus awareness campaign, futsal tournament, social media campaign leh campaign dangte kalpui an rêl a ni.